ده‌ستپێشخه‌رییا نووژه‌نكرنا ته‌ختێن‌ فێرگه‌هان

ده‌ستپێشخه‌رییا نووژه‌نكرنا ته‌ختێن‌ فێرگه‌هان
ته‌حسین ناڤشكى

ته‌ختێ روونشتنێ (ره‌حله‌) ئه‌ڤ جهێ پرانییا مه‌ ل فێرگه‌هێ، وه‌ك مالا خوه‌ یا دووێ ژیێ خوه‌ لسه‌ر بۆراندى، هنده‌ك  چیرۆك و بیره‌وه‌رییێن وى جهێ دگه‌ل هه‌ڤال و مامۆستایان هیشتا لبیرا مه‌نه‌. دسه‌رهندێ را دبت، هێشتا ئه‌م ب دورستى مفایێ ڤى جهێ پیرۆز نزانین، ژ به‌ر هندێ نوكه‌ ل گه‌له‌ك فێرگه‌هێن مه‌، هه‌كه‌ نه‌بێژین هه‌موویان، دێ بینین ب ده‌هان ته‌ختێن (ره‌حله‌یێن) شكه‌ستى و ژ كار كه‌ڤتى د هاڤێتینه‌ به‌ر بارانێ، ژ به‌ر نه‌بوونا ئومباران و جهێن تایبه‌تێن پاراستنا وان كه‌مباختر لێ هاتینه‌. ئه‌ڤه‌ ژبلى وان ره‌حله‌یێن ل ئومبارێن په‌روه‌رده‌یێن هه‌رێمێ دا كو ره‌وشا وان گه‌له‌ك خاربتره‌ ژ وانێن هێشتا ژ فێرگه‌هان نه‌ڤه‌گوهاستینێ.
ئه‌ڤه نموونه‌یه‌‌ك ژ گه‌له‌ك نموونه‌یێن دى دسازییێن مه‌ دا كو پرانییا مه‌ هه‌ست ب به‌رپرسیاره‌تیێ و ژێبوونا نه‌توه‌یى ناكه‌ن و هزر ناكه‌ن ئه‌ڤ كه‌لوپه‌له‌ ییێن مه‌ هه‌موویانه‌، ژ به‌ر كو ژ بلى كو حوكمه‌ت هه‌ر ژ من و ته‌ پێكدهێت، وه‌كى دى، هه‌ر ئه‌ڤ كه‌لوپه‌له‌ دێ بۆ به‌ره‌بابێن پشتى مه‌ مینن‌. كه‌واته‌ ده‌مێ كوڕه‌ك یان كچه‌كا هه‌ر كه‌سه‌كى ژ مه‌ ژ وێ قۆناغا خواندنێ دچیته‌ قۆناغه‌كا دى، هه‌كه‌ هه‌ر ئه‌ندامێن وى خێزانى نه‌هێنه‌ سه‌ر وێ كورسیكێ، زاڕۆیێن مرۆڤه‌كى وى یان گوندیه‌كى وى یان هه‌ر نێزیكه‌كى دى دێ هێته‌ وى جهى به‌رده‌وامیێ بكارێ خوه‌ ده‌ت و كاروانێ ژیانێ راناوه‌ستت.
لڤێ دوماهیێ ژێده‌ره‌ك نێزیك (په‌روه‌رده‌یا رۆژا ئاڤا قه‌زا دهۆك) ئه‌م ئاگه‌هدار كرینه‌ كو وان  وه‌ك ده‌ستپێشخه‌رییه‌ك دیرۆكى، ده‌ست ب نووژه‌نكرنا ته‌ختێن فێرگه‌هان كرییه‌، ب هه‌ڤكارییا جهێن دى یێن شۆله‌ژێ دێ به‌رده‌وام بن لسه‌ر نووژه‌نكرنا ره‌حله‌یێن ژ كاركه‌ڤتى د ئونبارێن په‌روه‌رده‌یێ دا. هه‌لبه‌ت هه‌كه‌ ئه‌ڤ پڕۆژه‌یه‌ به‌رده‌وامبوو د ژیوارى دا، دێ بیته‌ جهێ دلخۆشیا خه‌لكه‌كى كو هینگێ دێ هه‌ست پێ كه‌ن كو هنده‌ك به‌رپرس هه‌نه‌ ب راستا دلسۆزییا پاراستنا كه‌لوپه‌لێن وه‌لاتى  هه‌یه‌ كو وه‌نه‌كه‌ن ئه‌ڤ كه‌لوپه‌له‌ هه‌در بچن و ژ هاڤێتنێ رزگار بكه‌ن.
چه‌سپاندنا ڤى پڕۆژه‌ى ئه‌ڤرۆ ب كاریار، وسا نیشادده‌ت كو نه‌ مه‌ ته‌ختێن روونشتنێ ب تنێ هه‌نه‌ ئه‌نجامێ نه‌بوونا هۆشیاریێ لجه‌م فێرخوازێن مه‌ و پووته‌پێنه‌كرنا هنده‌ك مامۆستایان و كارگێریێن وان ب كه‌لوپه‌لێن فێرگه‌هان، زێده‌بارى لاوازییا كولتۆرێ ژێبوونا وه‌لاتى، دبت مه‌ گه‌له‌ك جۆرێن دى یێن كه‌لوپه‌لان هه‌نه‌، دهێنه‌ ژ كاركه‌ڤتن و هاڤێتن، تنێ پێدڤى چاڤدانێ ونووژه‌نكرنێ نه‌ كو جاره‌كادى بكه‌ڤنه‌ د خزمه‌تێ دا و مفا ژێ بهێت وه‌رگرتن.
ب دیتنا من ئه‌ڤ ده‌ستپێشخه‌رییه‌‌ دا گه‌له‌ك كاریگه‌ر تربیت، هه‌كه‌ جهێن بلندتر، تایبه‌ت وه‌زاره‌تا په‌روه‌رده‌یێ پێ راببایه‌ و كربایه‌ فه‌رمانا وه‌زارى كو هه‌موو په‌روه‌رده‌یێن گشتى و قه‌زایان بچه‌سپاندنا بڕیارێ پێگیربانه‌ و كربایه‌ چالاكییه‌ك گشتى و هه‌موو كه‌لوپه‌لێن، ب ناڤ ژ كاركه‌تى یێن فێرگه‌هان نووژه‌نكربانه‌، كانێ چاوا فێرگه‌هان و ئاڤاهیێن دى نووژه‌ن دكه‌ن و جاران پاره‌یه‌ك ئاشۆپى لێدده‌ن.

ل رۆژنامه‌یا وار هژمار 795 به‌لاڤبوویه‌

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *