رێڤه‌به‌رێ په‌روه‌ردا رۆژئاڤا: قوتابخانێن دهۆكێ دێ بنه‌ بریتش كونسول

رێڤه‌به‌رێ په‌روه‌ردا رۆژئاڤا: قوتابخانێن دهۆكێ دێ بنه‌ بریتش كونسول

رێڤه‌به‌رێ په‌روه‌ردا قه‌زا دهۆك پشكا رۆژئاڤا د دیداره‌كا رۆژناما ئه‌ڤرۆ دا به‌حسێ لاوازیا ئاستێ زانستى یێ قوتابیان كر و راگه‌هاند كو وان پێنگاڤێن مه‌زن بۆ چاره‌سه‌ریا ڤێ ئاریشێ هاڤێتینه‌ و گۆت ژى: (كونسولیا بریتانى ب هه‌ڤكاریا كۆمپانیه‌كێ ئه‌ڤ ساله‌ سیسته‌مێ پێنچ قوتابخانێن سنوورێ وان كرینه‌ بریتش كونسول و سالا بهێته‌ دێ هه‌موو قوتابخانێن دهۆكێ و ئامێدیێ ڤى سیسته‌مى بخۆڤه‌ گریت).
عومه‌ر ئه‌حمه‌د قاسم، رێڤه‌به‌رێ په‌روه‌ردا قه‌زا دهۆك پشكا رۆژئاڤا دیار كر، پشتى وى پۆستێ رێڤه‌به‌ریێ وه‌رگرتى، ئێكسه‌ر هزر د بلندكرنا ئاستێ زانستى یێ قوتابیان دا كریه‌ و پلان ژ بۆ ڤێ یه‌كێ دانایه‌ چونكو سال بۆ سالێ رێژه‌یێن ده‌رچوونێ كێمتر لێ دهێن و ئاستێ وان دهێته‌ خوار، وه‌كو به‌راوردیا ئاشكرا ل گه‌ل هه‌ولێر و سلێمانیێ، ل وه‌رزێ خواندنا 2010-2011 ل سلێمانیێ دۆرێن 900 قوتابیاند سه‌ر 90 را معه‌ده‌ل ئینابوون و ل هه‌ولێرێ پتر ژ 60 قوتابیان و ل دهۆكێ ب تنێ 50 قوتابى بوون، ئه‌ڤه‌ ژى كێشه‌كا مه‌زنه‌ د سنوورێ په‌روه‌ردێ دا هه‌ى.

ئه‌ڤرۆ: هه‌وه‌ پێنگاڤ بۆ چاره‌سه‌ریا بلنكرنا ئاستێ قوتابیان هاڤێتینه‌؟
عومه‌ر ئه‌حمه‌د: پشتى ئه‌ز بوویمه‌ رێڤه‌به‌رێ په‌روه‌ردا رۆژئاڤا ئێكه‌م پێنگاڤا من هاڤێتى د ڤى بوارى دابوویه‌، من كۆمبوونه‌ك ل گه‌ل سه‌رپه‌رشت و رێڤه‌به‌رێن قوتابخانان كر و تێدا ته‌كه‌ستى ل سه‌ر دووڤچونا ئاستێ زانستى د قوتابخانان دا كر.
ناڤبرى زێده‌تر گۆت: كێمیا ئاڤاهیان ژى ئێك ژ ئاریشێن هه‌رده‌میه‌ ل په‌روه‌ردێ هه‌ى، چونكو هه‌تا نها ژى سێ قوتابخانه‌ ل دهۆكێ هه‌نه‌ د سێ ده‌اومى نه‌، ئه‌ڤه‌ ژى بۆ زۆریا قوتابیان ڤه‌دگه‌ریت و سال بۆ سالێ خه‌لك مشه‌ دبیت و دڤێت سالانه‌ په‌روه‌رده‌ ئاڤاهیێن نوو دروست بكه‌ت دا بشێت هه‌موو قوتابیان وه‌ربگریت، هه‌روه‌سا نه‌بوونا ئاڤاهیانه‌ بووینه‌ ئه‌گه‌ر ل گه‌له‌ك قوتابخانان 50 قوتابى د ئێك پۆل دا بن.
ل دور بجهئینانا سیسته‌مه‌كێ نوو بۆ قوتابیان رێڤه‌به‌رێ قه‌زا دهۆكێ پشكا رۆژئاڤا گۆت: بریارا وه‌زاره‌تا په‌روه‌ردا حكوومه‌تا هه‌رێما كوردستانێ یه‌ كو ئه‌ڤ ساله‌ ل هنده‌ك قوتابخانێن دهۆكێ سیسته‌مێ بریتش كونسول بهێته‌ دانان، چونكو كونسولیا بریتانى ل گه‌ل كۆمپانیه‌كێ هنده‌ك شاره‌زا ژ ده‌رڤه‌ ئیناینه‌ و به‌رى نها ئه‌ڤ سیسته‌مه‌ ل هنده‌ك پارێزگه‌هێن عیراقێ هاتیه‌ بجهكرن و نوكه‌ هه‌رێم هه‌موو ڤه‌گرتیه‌ و نها مه‌ ئه‌و سیسته‌مه‌ ل سه‌ر پێنج قوتابخانێن سنوورێ مه‌ (هه‌لز یا كچان، چوارستین، په‌رله‌مان، مازى یا نموونه‌یى و كوردستان) سه‌پاندیه‌ و پتریا ماموستایێن مه‌ چووینه‌ خۆله‌كێ بۆ زانینا بجهئینانا ڤى سیسته‌مى و گۆت: د ڤى سیسته‌مى دا قوتابى د بنه‌ گرۆپ گرۆپ و رێكێن نوو یێن فێركرن و په‌روه‌رده‌كرنێ تێدا هه‌نه‌ و ره‌نگه‌ بۆ سالا بهێته‌ هه‌موو قوتابخانێن دهۆكێ ب ڤه‌گریت.

ئه‌ڤرۆ: هه‌تا نوكه‌ قوتابیێن ئێكێ هه‌تا شه‌شێ بنه‌ره‌ت ئاریشا زێده‌ هه‌لگرتنا په‌رتۆكان هه‌یه‌ و چو چاره‌سه‌رى بۆ نه‌هاتیه‌ دیتن؟
رێڤه‌به‌ر: من ل ده‌ستپێكا سالا كومبوونه‌ك ل گه‌ل رێڤه‌به‌رێن قوتابخانێن بنه‌ره‌ت كر و تێدا مه‌ ژێ خواستیه‌ نه‌خشه‌ بۆ قوتابیان بهێته‌ دانان و بۆ وان بهێته‌ چاپكرن و هه‌ر قوتابیه‌كى نه‌خشه‌ ل گه‌ل دا هه‌بیت و دایباب بۆ وان په‌رتۆكێن رۆژانه‌ دروست بكه‌ت و هه‌كه‌ قوتابیان ئه‌و نه‌خشه‌ نه‌ وه‌رگرتبیت، ب رێیا رۆژناما ئه‌ڤرۆ ژ دایبابان دخوازین سه‌ره‌دانا قوتابخانێ بكه‌ن و وى نه‌خشه‌ى وه‌ربگرن.

ئه‌ڤرۆ: سێ سال ب سه‌ر بریارا نووژه‌نكرنا ئاماده‌یا سه‌فین یا كچان ڤه‌ چوو و چ دیار نینه‌ و ئاڤاهى هه‌رده‌م د مه‌ترسیا هه‌رفینێ دایه‌؟
رێڤه‌به‌ر: ل دووڤ پلانێ ل به‌ره‌ ل سالا 2013 بهێته‌ نووژه‌نكرن و دێ دووڤچوونێ كه‌ین هه‌كه‌ ئاڤاهیێ وان زێده‌ یێ بێ سه‌روبه‌ر بیت، دێ ڤه‌گوهێزینه‌ قوتابخانا ره‌وشه‌ن هه‌تا ئاڤاهیێ وان چاره‌سه‌ر دبیت.
د سنوورێ په‌روه‌ردا رۆژئاڤا دا، 114 قوتابخانه‌ هه‌نه‌، ژ وان 24 ئاماده‌یى نه‌، چوار په‌یمانگه‌هن، سێ پیشه‌یى نه‌ و 77 قوتابخانێن بنه‌ره‌ت و شه‌ش باخچه‌نه‌، 671 ماموستا د سنوورێ په‌روره‌دا رۆژئاڤا دا وانه‌یان دبێژن، 142 ماموستایێن په‌یمانگه‌هان، 97 ماموستا ل ئاماده‌یێن پیشه‌یى 3436 () و ل باخچان 244 ماموستا ل باخچه‌یان هه‌نه‌. د وان 114 قوتابخانان دا 1699 پۆلێن خواندنێ هه‌نه‌ و هژمارا قوتابیان دگه‌هیته‌ 57 هزار و 48 قوتابیان، 12425 قوتابى ئاماده‌یى نه‌، 1090 په‌یمانگه‌هن، 973 پێشه‌یى، 40469 بنه‌ره‌ت و ل باخچه‌یان 2091 قوتابى هه‌نه‌ و ره‌نگه‌ ئه‌ڤ ئاماره‌ د گوهۆرینێ د بن، چونكو ئه‌ڤ ئاماره‌ یا ده‌ستپێكى یه‌.
عومه‌ر ئه‌حمه‌د قاسم، رێڤه‌به‌رێ په‌روه‌ردا قه‌زا دهۆك پشكا رۆژئاڤا زێده‌بارى هه‌بوونا وان قوتابخانه‌ و ماموستایان گۆت: ئه‌م پێدڤى ب ماموستایێن بنه‌ره‌ت ژ قوناغا ئێكێ هه‌تا شه‌شێ بنه‌ره‌ت نینین، به‌لێ مه‌ پێدڤى ب ماموستایێن ئاماده‌یى هه‌یه‌، 111 ماموستایێن ئاماده‌یى و 320 ماموستا ژى بۆ بنه‌ره‌تا ژ حه‌فتێ هه‌تا نه‌هێ و ئه‌و ژى دڤێن ده‌رچوویێن كولیژێ بن.

ئه‌ڤرۆ: ئه‌میر ئه‌ترووشى

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *