وه‌زیرێ په‌روه‌ردێ: دێ بزاڤێ كه‌م جوداهیه‌ك د ناڤبه‌را مووچێ مامۆستایێن گوند و باژێران دا هه‌بیت

وه‌زیرێ په‌روه‌ردێ: دێ بزاڤێ كه‌م جوداهیه‌ك د ناڤبه‌را مووچێ مامۆستایێن گوند و باژێران دا هه‌بیت

د پشكا دووێ یا هه‌ڤدیتنێ دا ل گه‌ل رۆژناما ئه‌ڤرۆ د. عسمه‌ت محه‌مه‌د خالد وه‌زیرێ په‌روه‌ردا حكوومه‌تا هه‌رێما كوردستانێ دیار كر كو مه‌زنترین خه‌له‌لا ل كوردستانێ هه‌ی یا مووچه‌یانه‌ و ل دور هه‌بوونا وانێن تایبه‌ت ژى دیار كر یا نوكه‌ فه‌وزایه‌ و ئه‌و ل گه‌ل رێكخستنا وانێن تایبه‌ته‌ و گۆت: (بۆچی كلینیكێن دختورا و نڤیسینگه‌هێن ئه‌ندازیارا هه‌نه‌ و ناچێبیت ماموستا وانێن تایبه‌ت بێژن).

ئه‌ڤرۆ: گازندا وێ یه‌كێ دهێتـه‌ كرن كو بۆ ده‌ستنیشانكرنا به‌رپرسێن یه‌كێن سه‌رپه‌رشتیێ چ مه‌رجێن وه‌سا نینن كو بێژن ده‌رچوویێن زانكۆیێ بن یان كا چه‌ند سال خزمه‌ت هه‌بن، بۆچی مه‌رجێن باش نه‌هاتینه‌ دانان؟
د. عسمه‌ت محه‌مه‌د خالد: قانوون یا پێ هه‌ی و مه‌ یا بجه ئینای و بۆ جارا ئێكێ یه‌ وه‌زاره‌تا په‌روه‌ردێ دو تشتان دكه‌ت، ئێك ب رێیا سیڤیان و هه‌ڤدیتنێ خه‌لكى د دامه‌زرینیت و ب رێیا راگه‌هاندنێ و تاقیكرنێ رێڤه‌به‌را د دانیت، بێگومان ئه‌وێن نه‌ ده‌ركه‌ڤن دێ هه‌ر گازندان كه‌ن، لێ باوه‌ر بكه‌ ئه‌و گوهۆرینا د هه‌لبژارتنا رێڤه‌به‌ران دا هاتیه‌ كرن ئێك ژ گوهۆرێنێن مێژوویی یه‌.
ئه‌ڤرۆ: ماموستایێن ب رێیا تاقیكرنێ سه‌ركه‌فتین هه‌موو وه‌كو رێڤه‌به‌ر هاتینه‌ دانان؟
د. عسمه‌ت محه‌مه‌د خالد: به‌لێ پار مه‌ بجه ئینا و هه‌موو ماموستا هاتنه‌ دانان.
ئه‌ڤرۆ: ئاسته‌نگ و رێگری به‌رامبه‌ر پرۆژێ هه‌وه‌ هه‌بوون د دانانا رێڤه‌به‌ران دا ب رێیا تاقیكرنان؟
د. عسمه‌ت محه‌مه‌د خال: سرۆشتی یه‌ كو نه‌رازیبوون هه‌بن ژلایێ ئه‌و مرۆڤێن نوویاتیێ و بنه‌مایێن زانستی قه‌بوول نه‌كه‌ن. بۆچی ئه‌ز دێ بێ سیڤی و هه‌ڤدیتن خه‌لكی كه‌مه‌ رێڤه‌به‌ر، یان دێ بۆچی ل سه‌ر بنیاتێ نیاسینی و مرۆڤاینى و ته‌زكیه‌ دانم! هه‌ر چاوا بیت ل هه‌ر سێ پارێزگه‌هان مه‌ گوهۆرین ل سه‌ر ڤی سیسته‌مى كرن و ل گور دلێ مه‌ بوون، ڤێجا كا چ د دلێ ئێكی دا یه‌ ئه‌ز نوزانم، ل ده‌ستپێكێ وه‌كو هزر هنده‌كان پێ نه‌خۆش بوو، لێ پشتى مه‌ بۆ روونكری ده‌زگه‌هێن ئیداری و حزبی ژى گه‌له‌ك پێ دلخوش بوون و هه‌ر چاوا بیت مه‌ چ ئاسته‌نگێن وه‌سا به‌رامبه‌ر بجهئینانا وی سیسته‌مى نه‌دیتن.
ئه‌ڤرۆ: هه‌ر چه‌ند سالان جاره‌كێ دێ تاقیكرن بۆ دانانا رێڤه‌به‌رێن قوتابخانان هێنه‌ كرن؟
د. عسمه‌ت محه‌مه‌د خالد: ل دووڤ پێدڤیاتیێ یه‌.
ئه‌ڤرۆ: ل دو ئاڤاكرنا قوتابخانان گازنده‌ ژ وه‌زاره‌تا په‌روه‌ردێ دهێتـه‌ كرن كو پتر گرنگیێ ب دیكورێ ده‌رڤه‌یێ قوتابخانێ د ده‌ن و د ناڤ دا ل سه‌ر بنیاتێن زانستی ناهێنه‌ ئاڤاكرن، د ده‌مه‌كى دا كو جهێ 20 پولا هه‌یه‌ 15 پولا چێ دكه‌ن، هه‌روه‌سا وه‌زاره‌تا په‌روه‌ردێ قه‌یرانا جهی یا هه‌ى، یان ژى قوتابخانێ خزمه‌تگوزار و ئاڤ نینه‌ ده‌مێ قوتابخانه‌ دهێته‌ ئاڤاكرن گه‌له‌ك جه بۆ باخچان دهێته‌ ته‌رخانكرن؟
د. عسمه‌ت محه‌مه‌د خالد: نه‌بوونا خزمه‌تگوزارا و ئاڤێ تشته‌كێ راسته‌ و مه‌ داخواز یا كری ئه‌ڤه‌ بهێته‌ چاره‌سه‌ر كرن و بابه‌تێ پاقژكرنا قوتابخانان هه‌كه‌ په‌روه‌ردا خۆ پاقژیێ نه‌بیته‌ ئێك ژ ئه‌ركێن په‌روه‌ردێ، ماموستای و قوتابی، چ مرۆڤ نه‌شێن جهێ هزار كه‌سان پاقژ كه‌ن. راسته‌ مه‌ كێماسی د ئاڤاهیان دا یا هه‌ی و هنده‌ك ئاڤاهیێن مه‌ د كه‌ڤنن، لێ ئه‌ڤ ئاڤاهیێن ڤێ دووماهیێ هاتینه‌ ئاڤاكرن گه‌له‌ك د باش بوون و نوكه‌ دێ 500 قوتابخانان ل دووڤ سیسته‌م و ستانده‌ردێن نێڤده‌وله‌تی ئاڤا كه‌ین و ئه‌ز دشێم بێژمه‌ ته‌ ل وه‌لاتێن ده‌وروبه‌ر ژى تشتێن هوسا نینن و ئه‌ڤه‌ یێ د قوناغا راگه‌هاندنێ دا و ره‌نگه‌ پشتى هه‌یڤه‌كا دی بهێنه‌ راسپاردن و پتر ژ 100 ژوان دێ ل پارێزگه‌ها دهۆكێ بن و نیڤه‌كا وان قوتابخانان باخچه‌یێن ساڤایان ژى یێن ل گه‌ل.
ئه‌ڤرۆ: پارێزگه‌ها دهۆكێ ب تایبه‌تى سه‌نه‌ته‌رێ قه‌زا دهۆك قه‌یرانا ئه‌ردی یا هه‌ى، هوون چاوا شیاینه‌ جهى بۆ 100 قوتابخانێن ل دووڤ ستانده‌ردێن نێڤده‌وله‌تی په‌یدا بكه‌ن؟
د. عسمه‌ت محه‌مه‌د خالد: نه‌بتنێ ل دهۆكێ، ل ده‌ڤه‌رێن كه‌ڤنێن هه‌موو باژێران مه‌ قه‌یران یا هه‌ى، ل سلێمانیێ مه‌ قه‌یران پتر یا هه‌ى.
ئه‌ڤرۆ: دێ چاوان وێ قه‌یرانێ چاره‌سه‌ر كه‌ن؟
د. عسمه‌ت محه‌مه‌د خالد: هه‌كه‌ جهه‌كێ گه‌له‌ك پێدڤیه‌ ما چ قه‌یدی یه‌ بلا حكوومه‌ت هنده‌ك خانیان ل ده‌وروبه‌ران استملاك بكه‌ن و دو پارچێن ئه‌ردى ب ده‌ته‌ ل گه‌ل دێ دروست بیت، ل هه‌ولێرێ مه‌ كێمترین كێشا ئه‌ردی یا هه‌ى، ل گه‌رمیان ژى مه‌ ئه‌ردێ هه‌ى، ل دهۆكێ ل ده‌رڤه‌ی باژێری مه‌ یێ هه‌ی، به‌س د ناڤ سه‌نته‌رێ دهۆكێ دا راسته‌ مه‌ ئاریشا ئه‌ردی یا هه‌ى.
ئه‌ڤرۆ: گازندا وێ یه‌كێ ژى دهێته‌ كرن كو گه‌له‌ك جاران قوتابخه‌نه‌ك پێدڤی ب نوژه‌نكرنێ یه‌، لێ د ده‌مێ بێهنڤه‌دانێ دا ناهێته‌ نوژه‌نكرن، به‌لكو د هه‌یڤا سێ دا كو هه‌موو دو هه‌یڤ بۆ دووماهی هاتنا قوتابخانێ د مینن، دێ بریارا خرابكرنا قوتابخانێ هێت و قوتابیێن وێ قوتابخانێ بۆ ماوێ چه‌ند رۆژان دێ بێ جه مینن هه‌تا كو د چنه‌ د قوتابخانه‌كا دى ڤه‌ و كارتێكرنێ ل وێ ژى دكه‌ن و دبیته‌ سێ ده‌وامی و ب ڤێ چه‌ندێ كارتێكرن ل خاندنا قوتابیان دهێـته‌ كرن، هه‌وه‌ پلان هه‌نه‌ ئه‌ڤێ چه‌ندێ نه‌هێلن؟
د. عسمه‌ت محه‌مه‌د خالد: به‌ری نوكه‌ ئه‌و ئاخفتن گه‌له‌ك یا راست بوو و مخابن ل سه‌ر وێ یه‌كێ د ما كا دا كه‌نگی بۆدجه‌ هێتـه‌ په‌سه‌ند كرن و رازیبوون ل سه‌ر پاران دهاته‌ دیار كرن، لێ مه‌ نوكه‌ سیسته‌مێ قوتابخانێن (ئاڤاهیێن ئاماده‌) یێ دانای، له‌وما ئه‌و كێشه‌ نامینیت، ژ به‌ر كو دێ بێژینه‌ خۆدانێ كومپانیێ مه‌ قوتابخانه‌ك دڤێت ل فلان جهى و ئه‌و دێ ل كومپانیێ دروست كه‌ت و به‌س دێ ئینیته‌ وی جهی لێكده‌ت، له‌وما گه‌له‌ك گه‌له‌ك شه‌ش هه‌یڤ بۆ ئاڤاكرنا قوتابخانێ پێ دڤێن و ئه‌ڤه‌ دێ مه‌ ژ وێ كێشێ خلاس كه‌ت و نوكه‌ ل دهۆكێ مه‌ گه‌له‌ك ئه‌و كێشه‌ یا هه‌ی.
ئه‌ڤرۆ: هاته‌ گۆتن په‌یمانگه‌ه دێ بۆ ماموستایێن ده‌رچووێن په‌یمانگه‌هێن پیشه‌سازی، بازرگانى و وه‌رزشێ هێـنه‌ ڤه‌كرن، ئایا ل ده‌ستپێكێ كی دێ هێنه‌ وه‌رگرتن؟
د. عسمه‌ت محه‌مه‌د خالد: هه‌ر كه‌سێ ماموستا بیت دێ وه‌رگرین، لێ هه‌لبه‌ت دێ هنده‌ك پیڤه‌ران دانین، ئه‌ڤجا چ ل سه‌ر بنیاتێ خزمه‌تێ یان تایبه‌تمه‌ندیێ بیت و دێ ل چوار پارێزگه‌هان هێنه‌ ڤه‌كرن، ل گه‌رمیان، سلێمانیێ، هه‌ولێرێ و دهۆكێ و ب دیتنا من هه‌ر سالێ دێ چوار هزار قوتابی هێنه‌ وه‌رگرتن و هورده‌كاریێن بابه‌تى پشتى چه‌ند رۆژێن دی دێ هێنه‌ به‌لاڤكرن.
ئه‌ڤرۆ: زێده‌ییا موچه‌یێن ماموستایێن هه‌ولێرێ و دهۆكێ یێن هه‌یڤێن مای دێ كه‌نگی گه‌هن؟
د. عسمه‌ت محه‌مه‌د خالد: مه‌زنترین خه‌له‌لا د كوردستانێ دا هه‌ی یا مووچه‌یانه‌، پیڤه‌ر و بۆچوونێن جودا جودا د وه‌ختی دا یێن هاتینه‌ بكار ئینان و ل دووڤ باوه‌را من پێدڤیه‌ پێداچوونه‌ك بهێتـه‌كرن، نه‌بتنێ بۆ ماموستایان، به‌لكو بۆ هه‌موو فه‌رمانبه‌ران، ئه‌م گه‌له‌ك یێ تێدا شوول دكه‌ین، به‌س ئه‌ز نوزانم دێ كه‌نگی ب دووماهی هێت.
ئه‌ڤرۆ: هنده‌ك ماموستا ل قوتابخانێ 24 وانان د حه‌فتیه‌كێ دا دبێژن و هنده‌ك ژى بتنێ 12 دبێژن و مووچه‌یێ وان ژى وه‌كو ئێكه‌، هه‌وه‌ چ پلان هه‌نه‌ دادپه‌روه‌ریه‌كێ د ڤی بواری دا په‌یدا بكه‌ن؟
د. عسمه‌ت محه‌مه‌د خالد: نوكه‌ ئه‌م یێ د پێ ڤه‌، ژ به‌ر كو ره‌نگه‌ مه‌ هنده‌ك قوتابخانه‌ هه‌بن 20 ماموستایێن زێده‌ لێ هه‌بن و ئه‌ڤه‌ وێ د گه‌هینیت كا ئایا یا پێدڤیه‌ ئه‌ز ماموستایان ژ گوندان ڤه‌گوهێزمه‌ باژێری!!!
ئه‌ڤرۆ: هه‌وه‌ چ به‌رنامه‌ هه‌یه‌ كو ماموستایێن زێده‌ ل قوتابخانا نه‌هێلن و هه‌موو وه‌كو یه‌ك وانان بێژن و ره‌نگه‌كێ دادپه‌روه‌ریێ په‌یدا كه‌ن؟
د. عسمه‌ت محه‌مه‌د خالد: نوكه‌ ئه‌م یێ پێداچوونێ تێدا دكه‌ین و مه‌ داتاپێسه‌ك یێ چێكری و دێ بزاڤێ كه‌م دادپه‌روه‌ریێ په‌یدا كه‌م، لێ ئه‌ڤ بابه‌ته‌ یێ ب ساناهی نینه‌، لێ دێ پێدا چم و دێ باشتر لێ كه‌م كو ئه‌ز بێژمه‌ ته‌ دێ بن بڕ كه‌م ئه‌و گه‌له‌كا ب زه‌حمه‌ته‌ و شوول پێ دڤێت.
ئه‌ڤرۆ: تو دشێی سۆزێ بده‌یه‌ ماموستایان كا بۆ نموونه‌ 80% دى دادپه‌روه‌ریێ په‌یره‌و كه‌ى؟
د. عسمه‌ت محه‌مه‌د خالد: ئه‌ز دێ 100% به‌رنامێ دادپه‌روه‌ریێ دانم و ل دووڤ شیانان دێ بجه ئینم، ژ به‌ر كو بۆ نموونه‌ من ژماره‌كا ماموستایا یا هه‌ی به‌لكو 30 هه‌تا 35 سالان خزمه‌ت یا هه‌ى و نوكه‌ یێ ل قوتابخانه‌كا ره‌خ مالا خۆ ڤه‌ رووونشتی یه‌ و ڤه‌گوهاستنا وی پرۆسه‌یه‌كا ب ساناهی نینه‌، دڤێت چاره‌یه‌ك بۆ بهێته‌ دیتن و ره‌نگه‌ گه‌له‌ك ژ وان پێدڤی ب خانه‌نشینكرنێ بن.
ئه‌ڤرۆ: دێ چاوان به‌رنامێ دادپه‌روه‌ریێ 100% دانی؟
د. عسمه‌ت محه‌مه‌د خالد: ل ده‌ستپێكێ ئه‌ز ناهێلم ڤه‌گوهاستن ژ گوندان بهێنه‌ د ناڤ باژێری دا، دێ بزاڤێ كه‌م جوداهیه‌ك د ناڤبه‌را مووچێ ماموستایێن گوندان و باژێران دا هه‌بیت و هه‌روه‌سا دێ ده‌رماله‌یان ب هژمارا وانان ڤه‌ گرێ ده‌م و هه‌ر كه‌سێ 24 ده‌مژمێرێن خۆ تمام نه‌كه‌ت ده‌رماله‌یان ناوه‌رگریت.
ئه‌ڤرۆ: ب ڤان خالان بتنێ دێ دادپه‌روه‌ری دروست بیت، یان هنده‌ك تشتێن دی ژی هه‌نه‌؟
د. عسمه‌ت محه‌مه‌د خالد: ئه‌ڤه‌ چه‌ند خاله‌كێن سه‌ره‌كی نه‌ و هه‌كه‌ نوكه‌ بێژی ماموستایێ 24 ده‌مژمێران وانان نه‌بێژیت ده‌رماله‌یێن په‌روه‌رده‌ى نا وه‌رگریت، ئه‌ڤه‌ ئێك ژ چاره‌سه‌ریانه‌، یان ژى تو بێژی ئه‌ز دێ ده‌رماله‌یێن زێده‌ بۆ گوندان دانم و ئیمتیازاتان دى ده‌مێ ئه‌و ژى چاره‌سه‌ریه‌كه‌، بۆ نموونه‌ ئه‌و ماموستایێ دچیته‌ گونده‌كی و بێژیت دێ مینمه‌ وێرێ بلا حكوومه‌ت ئه‌ردی بده‌ته‌ بۆ خۆ خانی ئاڤا كه‌ت.
ئه‌ڤرۆ: ل دور وانێن تایبه‌ت، ئایا تو ل گه‌لی؟
د. عسمه‌ت محه‌مه‌د خالد: ئه‌ز یێ جودا مه‌ ل گه‌ل گه‌له‌ك خه‌لكی، وانێن تایبه‌ت چ زیانێن وه‌سا نینن هه‌كه‌ ب ره‌نگه‌كێ رێك و پێك بهێنه‌ گۆتن، بۆچی كلینیكێن دختورا و نڤیسینگه‌هێن ئه‌ندازیارا هه‌نه‌ و ماڤپه‌روه‌ر ئێڤاری شوول دكه‌ن و ناچێبیت ماموستا بۆ خو پوله‌كێ ڤه‌كه‌ت و وانێن تایبه‌ت بێژیت، تشتێ خه‌له‌ت ئه‌وه‌ ماموستا دێ چیته‌ مالا ئێكی وانان لێ بێژیت، بلا ئه‌و ماموستا بۆ خۆ جهه‌كی یان پۆله‌كی ڤه‌كه‌ت و وانێن خۆ لێ بێژیت و بلا قوتابی ژى ب ره‌نگه‌كێ ئاشكرا بچن ناڤێن خۆ لێ بنڤیسن، یا دووێ ئێكێ پاره‌ یێن هه‌ین و دخوازیت ل په‌روه‌ردا زارۆكێن خۆ ب مه‌زێخیت بۆچی رێیێ نه‌ده‌ینێ؟ ماموستایێن خانه‌نشینكری یێن هه‌ین و دشێن خزمه‌تێ بكه‌ن، له‌وما ئه‌ز د گه‌ل رێكخستنا وانێن تایبه‌تم و ماده‌م خه‌لكی دڤێتن ب پاره‌ زارۆیێن خۆ پتر فێر كه‌ن تو نه‌شێی ببیه‌ رێگر.
ئه‌ڤرۆ: ئانكو تو د گه‌ل مانا وانێن تایبه‌تی؟
د. عسمه‌ت محه‌مه‌د خالد: ئه‌ز د گه‌ل مانا وێ مه‌ ل گه‌ل رێكخستنێ نه‌ك فه‌وزا.
ئه‌ڤرۆ: ئانكو یا نوكه‌ فه‌وزایه‌؟
د. عسمه‌ت محه‌مه‌د خالد: به‌لێ، ته‌قریبه‌ن.
ئه‌ڤرۆ: ماموستا خۆ ژ وێ یه‌كێ دزن كو ببنه‌ رێڤه‌به‌رێن قوتابخانان، ب باوه‌را ته‌ ئه‌گه‌ر چنه‌؟
د. عسمه‌ت محه‌مه‌د خالد: ئیمتیازات نینن و ئاریشێن وان گه‌له‌كن و دڤێت هاڤینێ ژى ده‌وامێ بكه‌ت، یا دووێ ژى ئایا ئه‌م شیاینه‌ خولێن دروست ڤه‌كه‌ین كو خه‌لكى بكه‌ینه‌ رێڤه‌به‌ر؟ به‌ری بێژین خه‌لك خۆ ژێ دزن، ئایا كینه‌ دێ بنه‌ رێڤه‌به‌ر؟ هنده‌ك بنه‌ما هه‌نه‌ خه‌لكی پێ بكه‌ینه‌ رێڤه‌به‌ر؟ له‌وما پێدڤیه‌ پێداچوونه‌ك باش د ڤی بابه‌تی دا بهێته‌ كرن.
ئه‌ڤرۆ: ل دور هه‌بوونا كه‌ناله‌كێ په‌روه‌رده‌یی، تو چه‌ند ب گرنگ دبینی؟
د. عسمه‌ت محه‌مه‌د خالد: گه‌له‌كا گرنگه‌، به‌س ئه‌م د خو را نابینین كه‌ناله‌كێ په‌روه‌رده‌یی ڤه‌كه‌ین، ژ به‌ر كو هه‌تا نوكه‌ ئه‌م ئه‌و شیان نینن.
ئه‌ڤرۆ: ژ چ ئالی ڤه‌ هه‌وه‌ ئه‌و شیان نینن؟
د. عسمه‌ت محه‌مه‌د خالد: ژ گه‌له‌ك روویان ڤه‌، ژ به‌ر كو رێكخستنا كه‌ناله‌كێ په‌روه‌رده‌یی تشته‌كێ ب ساناهی نینه‌ و ئه‌ركه‌كێ گه‌له‌كێ گرانه‌، مه‌ ئێك یێ ل سلێمانیێ هه‌ی، لێ هه‌تا نوكه‌ ئه‌م تێدا د سه‌ركه‌فتی نینین، ئه‌ز نابێژمه‌ ته‌ یێ فاشیله‌، لێ ئه‌ز گه‌له‌ك سه‌ركه‌فتنێ تێدا نابینم.
ئه‌ڤرۆ: ژبلی ئه‌ڤ خالێن مه‌ به‌حس كرین، هه‌وه‌ وه‌كو وه‌زاره‌تا په‌روه‌ردێ چ به‌رنامه‌یێن دی هه‌نه‌ و دێ پێداچوونێ د چ بوارێن دی دا كه‌ن؟
د. عسمه‌ت محه‌مه‌د خالد: ڤه‌كولینه‌كا گه‌له‌كا به‌رفره‌ه یا هه‌ى كا دێ چاوان قوتابخانێن لاواز لێكده‌ى، ئانكو دو یان سێ قوتابخانێن لاواز لێكده‌ی و بكه‌یه‌ قوتابخانه‌كا باش و ئه‌ڤه‌ ئێك ژ پرۆگرامێن مه‌ یێن نوویه‌. پێداچوون د په‌روه‌ردێ دا هه‌موو ئالیان ڤه‌دگریت و خۆ تشته‌ك من نینه‌ كو ئه‌ز بێژم ئه‌ز پێدا ناچم و ئه‌ڤێ پێداچوونێ پێدڤی یا ب وه‌ختی و شاره‌زاییێ و هاركاریا خه‌لكی و پشته‌ڤانیا دارایی هه‌ی و پێدڤیه‌ هنده‌ك تشت بهێنه‌ كرن كو خه‌لك بزانیت هه‌كه‌ هات و حه‌ژ حكوومه‌تا خۆ بكه‌ن به‌ری هه‌موویا دڤێت ئه‌و حه‌ژێكرن د رێیا په‌روه‌ردێ دا بیت و هه‌كه‌ حكوومه‌تێ بڤێت خزمه‌تا خۆ نیشا خه‌لكی بده‌ت دڤێت د رێكا په‌روه‌ردێ دا نیشا بده‌ت و هه‌تا نوكه‌ جهێ دلخوشیا منه‌ كو سه‌رۆكێ حكوومه‌تێ گه‌له‌ك گرنگیێ د ده‌ته‌ په‌روه‌ردێ و ئاڤاكرنا 500 قوتابخانان و سێ كومه‌لگه‌هێن پیشه‌یی كو ملیاره‌ك و سێ سه‌د هزار ملیون دولار بۆ هاتینه‌ ته‌رخانكرن، ئه‌ڤه‌ گوهۆرینه‌كا به‌رچاڤه‌ د مێژوویا په‌روه‌ردێ دا.

هه‌ڤپه‌یڤین، ڤه‌گێر سه‌عدوللا:
(2/2)

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *