پشتى پرۆگرامێ خواندنێ ل نه‌هێ بنه‌ڕه‌تى ژى بوویه‌ به‌هدینى؛ رێژه‌یا ده‌رچوونێ باشتربوویه‌

پشتى پرۆگرامێ خواندنێ ل نه‌هێ بنه‌ڕه‌تى ژى بوویه‌ به‌هدینى؛ رێژه‌یا ده‌رچوونێ باشتربوویه‌

وه‌یسى سلێمان رێڤه‌به‌رێ په‌روه‌رده‌یا ده‌ڤه‌ردارییا دهۆكێ

چه‌ند رۆژه‌ك ماینه‌ كو دێ ده‌رگه‌هێن دبستانان بۆ پێشوازی كرنا سالا نوو یا خواندنێ هێنه‌ ڤه‌كرن و فێرخواز و مامۆستا به‌ره‌ڤ دبستانان چن. ئه‌ڤ ساله‌ رێڤه‌به‌رییا په‌روه‌رده‌یا ده‌ڤه‌ردارییا دهۆكێ پ پێنگاڤ بۆ باشتركرنا ره‌وشا په‌روه‌رده‌یێ ل دبستانان هه‌یه‌؟ چ كێماسى هه‌نه‌ كو بۆ په‌روه‌ده‌ و دبستانان ئاسته‌نگان چێدكه‌ن؟ بۆ به‌رسڤاندنا ڤان پرسان و چه‌ندێن دى؛ مه‌ ئه‌ڤ هه‌ڤپه‌یڤینه‌ د وه‌یسى سلێمان رێڤه‌به‌رێ په‌روه‌رده‌یا ده‌ڤه‌ردارییا دهۆكێ ڕا سازكر.
بۆ هندێ كو ئه‌ڤ ساله‌ رێژه‌یا ده‌رچوونا زێده‌تر لێ بهێت؛ هه‌وه‌ چ پلان دارێژتییه‌؟ ئه‌ڤ پرسه‌ وه‌یسى وه‌ها به‌رسڤاند: ئه‌ڤ ساله‌ ئه‌نجامێن قۆناغا دوازده‌ى ئاماده‌یى و نه‌هێ بنه‌ره‌تى ژ پارسال باشتر بووینه‌، لێ هه‌ر نه‌ لدووڤ حه‌زا مه‌ بوویه‌، له‌و وه‌كو هه‌ر سال د هه‌یاما بێهنڤه‌دانا هاڤینێ دا مه‌ پلانێن خوه‌ بۆ سالا نوو یا خواندنێ دارێژتینه‌، ئه‌و ژى مینا چێكرنا چه‌ند لیژنه‌یێن سه‌رپه‌رشتیارێن بسپۆرى و بنه‌ره‌تى بۆ رێكخستنا میلاكێ دبستانان ل هه‌ر دو قۆناغێن بنه‌ره‌تى و ئاماده‌یى، دیسان داكو ئه‌ڤ ساله‌ هه‌ر ژ ده‌ستپێكا خواندنێ بشێین هه‌موو پێدڤییا فێرخوازان دابینبكه‌ین.
سه‌باره‌ت پێدڤییا وان ب مامۆستا و فه‌رمانبه‌ران، سلێمانى گۆت: پێشوه‌خت مه‌ ئامارێن خوه‌ یێن پێدڤییا مامۆستا و فه‌رمانبه‌ران داینه‌ رێڤه‌به‌رییا گشتى یا په‌روه‌رده‌یا پارێزگه‌ها دهۆكێ، كو مه‌ داخوازا دامه‌زراندنا 261 مامۆستایان بۆ قۆناغا ئاماده‌یى، 553 مامۆستا بۆ قۆناغا بنه‌ره‌تى و 666 نڤێسه‌ر و به‌رده‌ست و زێره‌ڤانێن دبستانان كرییه‌، كو سه‌رجه‌مێ وان دبیته‌ 1480 پله‌یێن دامه‌زراندنێ، گۆتژى هه‌موو مامۆستایێن كو نوو بۆ مه‌ دێ هێنه‌ دامه‌زراندن؛ دێ فرێكه‌نه‌ دبستانێن ده‌وروبه‌رێن دهۆكێ، ژبه‌ركو ل گۆره‌ى رێنمایان دڤێت مامۆستایێ نوو دامه‌زراندى پترى 3 سالان ل ده‌رڤه‌ى سه‌نته‌رێ باژێران خزمه‌تێ بكه‌ن؛ ژنوو دێ ماف هه‌بیت داخوازا ڤه‌گوهاستنا بۆ سه‌نته‌رێ باژێرى بكه‌ت. زێده‌تر گۆت: ئه‌ڤجا ئه‌م چاڤه‌رێینه‌ ئه‌ڤ پله‌یه‌ بۆ مه‌ بهێنه‌ دامه‌زراندن، داكو ب زووترین كێماسى و ڤالاهیێن د ناڤ دبستانان دا پربكه‌ین.
لدۆر وێ چه‌ندێ كا وان چ پلان بۆ ئاڤاكرنا ئاڤاهیێن دبستانان و نه‌ماما سێ ده‌ومایێ ل دبستانان هه‌یه‌؛ رێڤه‌به‌رێ په‌روه‌رده‌یا ده‌ڤه‌ردارییا دهۆكێ گۆت: ئه‌م سالانه‌ ئامارێن خوه‌ بۆ پێدڤییا ئاڤاهیێن دبستانان دده‌ینه‌ رێڤه‌به‌رییا گشتى یا په‌روه‌رده‌یا پارێزگه‌ها دهۆكێ و ئه‌و ژى ره‌وانه‌ى وه‌زاره‌تا په‌روه‌رده‌یێ دكه‌ن و سالانه‌ چه‌ند ئاهاهییه‌ك دهێنه‌ ئاڤاكرن، دیسان ئه‌ڤه‌ سێ سالا مه‌ پلانه‌ك دانایه‌ كو سالانه‌ ئاڤاهیێن سێ تا چار دبستانێن كه‌ڤنێن 6 پۆلى كو ئه‌ردێن به‌رفره‌هـ هه‌نه‌؛ خراب بكه‌ین و سه‌ر ژنوو ئاڤاهیێن پێشكه‌ڤتى و پتر ژ 18 پۆلى لێ ئاڤاكه‌ین، كو پێشى دو سالان سێ دبستان هاتنه‌ خرابكرن و پار ژى سێ و بۆ ئه‌ڤ ساله‌ ئاڤاهیێن چار دبستانان دێ هێنه‌ خرابكرن، له‌و مه‌ سێ ده‌وامى هێشتا هه‌یه‌ و ئه‌ڤ ساله‌ ژى سێ ده‌وامى هه‌ر دێ به‌رده‌وام بیت. گوتژى پار د سنوورێ په‌روه‌رده‌یا وان دا نێزیكى 16 دبستانان سێ ده‌وامى هه‌بوون.
پشتى كو بۆ سالا بۆرییا خواندنێ پرۆگرامێ نه‌هێ بنه‌ره‌تى ژى بوویه‌ به‌هدینى؛ چ كاریگه‌رى ل ئاستێ ده‌رچوونێ كر؟ ئه‌ڤ پرسه‌ ژى ب ڤى ئاواى به‌رسڤاند: پشتى پرۆگرامێ خواندنێ ل دبستانان بوویه‌ به‌هدینى و سالا بۆرى گه‌هشتییه‌ نه‌هێ بنه‌ره‌تى و فێرخوازان ب به‌هدینى خواندى و ئه‌زموون كرین؛ رێژه‌یا ده‌رچوونێ ل نه‌هێ بنه‌ره‌تى ژ سالێن بۆرى باشتر بوویه‌.
سه‌باره‌ت به‌هدینى بوونا پرۆگرامێ خواندنێ ل ده‌هێ ئاماده‌یى بۆ سالا نوو یا خواندنێ وه‌یسى سلێمان دبێژیت: وه‌كو دیار سال بۆ سالێ پرتووكێن پۆله‌كێ دبنه‌ به‌هدینى، ئه‌ڤجا ئه‌ڤ ساله‌ ژى پرتووكێن ده‌هێ ئاماده‌یى بووینه‌ به‌هدینى و پرتووك گه‌هشتینه‌ رێڤه‌به‌ریێن دبستانان ژى.
ناڤهاتى گۆتژى ده‌وامى فه‌رمى ل دبستانان ل 10ى ڤێ مه‌هێ دێ ده‌ستپێكه‌ت.
ل دووماهیێ ژى وه‌یسى گۆت: داخوازێ ژ هه‌موو سه‌رپه‌رشتیار، رێڤه‌به‌ر، مامۆستا، فێرخواز و سه‌میانێن فێرخوازان دكه‌م كو ئه‌م هه‌موو هه‌ست ب نه‌ته‌وه‌یى بوونا خوه‌ بكه‌ین و كار و خزمه‌تا خوه‌ دروست بجهبینین، داكو بشێین پاشه‌رۆژه‌كا گه‌ش بۆ وه‌لاتێ خوه‌ په‌یدا بكه‌ین. دیسان سوپاسییا هه‌موو مامۆستا و فێرخواز و رێڤه‌به‌رێن دبستانان دكه‌ین كو ئه‌زموونێن قۆناغا دوازدێ و نه‌هێ بنه‌ره‌تى بێى ئاریشه‌ هاتنه‌ كرن.

ژ، رۆژنامه‌یا وار
هه‌ڤپه‌یڤین: هه‌لگر به‌هائه‌ددین

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *