گوهۆڕین د سیسته‌مێ په‌روه‌رده‌يێ دا

گوهۆڕین د سیسته‌مێ په‌روه‌رده‌يێ دا
وه‌یسى سلێمان عه‌لى*

دهێته‌ زانین كو د درێژییا دیرۆكێ دا، هه‌ر تشتێ د گه‌ردوونێ دا خوه‌ نه‌گوهۆڕیت و ململانا هه‌ڤڕكێن خوه‌، پێخه‌مه‌ت ئه‌نجامێن باشتر نه‌كه‌ت، ئه‌و تشت به‌ره‌ڤ نه‌مانێ و بریانێیه‌. ئه‌ڤرۆ ل سه‌ر ده‌مێ جیهانیبوونێ و شۆڕشا ئاشۆپییا ته‌كنۆلۆژییا پێزانینان، یا كو خوه‌ ل هیڤییا كه‌سێ نه‌ گریت، گوهۆڕین د هه‌موو بوارێن ژیانێ دا بوویه‌ سننه‌تا ژیانێ و گرنگیه‌ك ته‌ڤێت ته‌ڤێت و هه‌ر لایه‌نێ ب گه‌رمى پشته‌ڤانییا گوهۆڕینێن پێدڤى نه‌كه‌ت، پاشه‌رۆژا وى لایه‌نى د ئاسۆیه‌ك نه‌دیار دا یه‌ و فه‌ره‌ هه‌ر ئێك ژ مه‌ ئه‌ڤێ باش بزانت و دووماهییێ ئه‌و ئیراده‌ هه‌بیت كو به‌رژه‌وه‌ندییێن خوه‌ یێن تایبه‌ت بهاڤێژت و به‌رژه‌وه‌ندیێن گشتى ل به‌ر چاڤ وه‌ربگریت.
دبیت هاڤێتنا ڤێ پێنگاڤێ ل جه‌م گه‌له‌ك كه‌سان و لایه‌نان ئه‌ڤرۆ یا بزه‌حمه‌ت و گران بیت، تا دكارت ئه‌ڤێ پێنگاڤا شارستانى په‌یره‌و بكه‌ت و به‌رده‌وامیێ پێ بده‌ت دا كو به‌ره‌بابێن ل پشت وى ژى دهێن چاڤلێبكه‌ن. فه‌ره‌ كار ژ هه‌موو لاه‌یانان بهێته‌ كرن دا كو ئه‌ڤ ژیواره‌ ل پیشیێ بۆ تاكه‌ كه‌سێ مه‌ و پاشى جڤاكێ مه‌ ببته‌ كولتۆر د هۆش و نه‌هۆشیێن وى دا و ب دورستى د ژیوارێ هه‌یى دا پراكتیزه‌ بكه‌ت و خوه‌ ب جیهانا شارستانى ڕا بگه‌هینت.
دبیت پرانییا مه‌ ئه‌ڤرۆكه‌ بزانن كو جیهانا رۆژهه‌لات و وه‌لاتێن دى یێن جیهانا پیشڤه‌ چوویى هه‌تا سیسته‌مێ گوهۆڕینێ و چاكسازیێ نه‌كرییه‌ كولتۆرێ خوه‌ و ژێبوونا ئالایێ وه‌لاتى نه‌كرییه‌ ئارمانجا خوه‌ یا سه‌ره‌كى كو ململانێ دگه‌ل نه‌توه‌یێن دى بكه‌ن نه‌شیان وه‌ك پێدڤى هه‌بوونا گه‌وهه‌رێ خوه‌ یێ ئابۆرى و سیاسى و جڤاكى بۆ خه‌لكه‌ك دى ئه‌شكه‌را كه‌ن و به‌رده‌وامیێ ب خرخالا پیشڤه‌چوونا ژیانێ بده‌ن.
ده‌م ئه‌ڤرۆكه‌ هاتییه‌، هه‌كه‌ ب سه‌ر ڤه‌ ژى نه‌ چووبیت، ئه‌م وێ چه‌ندێ باش بزانین كو ئه‌م ژى یێ دى قه‌بوول بكه‌ین و پشته‌ڤانییا پرۆسه‌یا گوهۆڕینان بجددى، نه‌ دكه‌رتێ په‌روه‌رده‌یێ ب تنێ دا بكه‌ین، گه‌له‌كا گرنگه‌ ئه‌ڤ پشته‌ڤانییه‌ بۆ د ته‌ڤایا داموده‌زگه‌هێن دى یێن هه‌رێما كوردستانێ هه‌بیت دا كو بۆ وى خه‌لكێ ئه‌ڤه‌ پتر ژ بیست سالانه‌ چاڤدێرییا پرۆسه‌یا مه‌ یا ده‌مۆكراسى و ئازادیێ دكه‌ن دیار بكه‌ین كو ئه‌م ژى وه‌لاته‌كین؛ هه‌كه‌ زه‌مینه‌ بۆ مه‌ خوه‌ش ببیت ئه‌م چ ژ خه‌لكه‌ك دى كێمتر نابین بۆ پراكتیزه‌كرنا پرۆسه‌یا ده‌مۆكراسیێ د وه‌لاته‌كێ نیمچه‌ سه‌ربوخوبوونا خوه‌ وه‌رگتى دا.
ب هزار من ئه‌ڤه‌ ژى هند ب ئاسته‌نگ نابیت، هه‌كه‌ هه‌ر ئێك ژ مه‌ ژ لایێ خوه‌ڤه‌ ده‌ستپێشخه‌ریێ بكه‌ت و گوهۆڕینێ ژ خوه‌ ده‌ستپێبكه‌ت، نه‌ ژ خه‌لكێ دى. كه‌واته‌ هه‌كه‌ من ل ده‌ستپێكێ ئه‌و ئیراده‌ هه‌بیت كو ئه‌ز خوه‌ بگوهۆڕم و ئه‌ڤێ گوهۆڕینێ ب سینگه‌ك به‌رفره‌ه وه‌ربگرم، هینگێ ئه‌ز دێ شێم كارتێكرنێ ل یێ به‌رانبه‌ر ژى بكه‌م كو ئه‌و ژى چ وه‌ك تاك یان جڤاك د خزمه‌تا گشتى دا خوه‌ بگوهۆڕیت و كاروانێ ژیانێ پیشڤه‌ ببه‌ت.

* رێڤه‌به‌رێ به‌رێ یێ په‌روه‌رده‌یا قه‌زا دهۆك

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *